Styrkjer suksessen som får innvandrarkvinner i jobb

Jobbsjansen er eit tiltak som rettar seg mot heimeverande kvinner med innvandrarbakgrunn. Fleire manglar eit nettverk utanom familien og fleire har også dårlege norskkunnskapar. Det kan gjera det ekstra krevjande å komma inn i arbeidslivet.

Målet med Jobbsjansen er å gi gode kvalifiseringstiltak for å komma i jobb eller utdanning.

– Ein viktig veg til integrering går gjennom deltaking i arbeidslivet. Kvinnene i Jobbsjansen opplever meistring og styrkjer moglegheitene sine for å komma i jobb. Når dei får bidrege med arbeidskrafta si og blir meir økonomisk sjølvstendige, er det bra både for kvar enkelt og for samfunnet, seier Libe Rieber-Mohn, direktør i Integrerings- og mangfaldsdirektoratet (Imdi).

Gjennomført i 42 kommunar

Deltakelse i Jobbsjansen kan også gi fleire positive effektar: auka sysselsetjing kan bidra til å redusera fattigdom, slik at færre barn av innvandrarar veks opp i tronge kår. Det kan auka likestillinga og skaffa landet svært velkommen arbeidskraft.

I 2025 vart prosjektet gjennomført i 42 kommunar, fordelt på 14 av fylka i landet. Ni bydelar i Oslo driftar også suksessprosjektet, som kan visa til svært effektive tal:

I fjor gjekk 74 prosent av innvandrarkvinnene ut i arbeid eller utdanning etter enda program. Det er ikkje uvanleg høgt for Jobbsjansen, som heilt tilbake til 2017 kan visa til ein suksessrate på mellom 70 og 79 prosent kvart år.

Blir meir aktive i lokalmiljøet

Programmet bidreg også til at innvandrarkvinnene får styrkt norskferdigheitene sine, auka det sosiale nettverket sitt og får betre kunnskap om det norske samfunnet. Dei kan betre følgja opp skulegangen for barna og fleire deltek meir aktivt i nabolaga sine.

– Suksesskriteria er kvinnene sin eigen innsats, god tilrettelegging og oppfølging frå kommunane, og dessutan arbeidsgivarar som treng arbeidskraft, seier Imdi-direktøren.

Skal bruka 210,5 millionar kroner

I 2025 har Imdi gitt midlar til om lag 1365 deltakarar i kommunane. No får endå fleire kommunar høve til å søkja om midlar til Jobbsjansen. I statsbudsjettet er tilskotsramma auka frå 180,6 millionar kroner i fjor til 210,5 millionar i år. Dei to siste åra har løyvingane auka med nesten 80 millionar kroner.

– Me ser fram til at endå fleire kvinner kjem i arbeid, blir økonomisk sjølvhjelpte og bidreg til fellesskapen. Prosjektet har gode resultat, skaper god integrering og styrkjer arbeidsdeltakinga, seier Rieber-Mohn.

FAKTA – Dette er Jobbsjansen

• Alle kommunar kan søkja Integrerings- og mangfaldsdirektoratet (Imdi) om tilskot til prosjekt i regi av Jobbsjansen.
• Søknadsfristen er 25. februar 2026 og her finn du meir informasjon om prosjektet og korleis søkja.
• I 2025 var det avsett 180,6 millionar kroner til programmet. Det gav kommunane kapasitet til 1 365 plassar til innvandrarkvinner.
• I 2026 er det budsjettert med 210,5 millionar kroner til Jobbsjansen, ein auke på 30 millionar kroner.
• Formålet er at fleire heimeverande skal ut i jobb. Dette er kvinner som står langt utanfor arbeidsmarknaden og som har behov for ulike tiltak for å komma seg i jobb eller utdanning.
• Målet er at kvar enkelt deltakar skal få styrkt kvalifikasjonane sine, slik at ho på sikt kan bli økonomisk sjølvhjelpt.
• Tiltaket er effektivt: 74 prosent av kvinnene som avslutta Jobbsjansen i 2025 var i arbeid eller utdanning etter eitt år.

Kommunar og bydelar i Jobbsjansen:

Akershus

Asker, Bærum, Lillestrøm, Lørenskog, Nordre Follo, Ullensaker, Vestby, Ås.

Agder

Arendal, Grimstad, Kvinesdal, Kristiansand, Vennesla.

Innlandet

Gjøvik, Tolga.

Møre og Romsdal

Hustadvika, Kristiansund, Molde, Ålesund.

Nordland

Grane.

Oslo

Alna, Bjerke, Grorud, Gamle Oslo, Grünerløkka, Nordre Aker, Sagene, Stovner, Søndre Nordstrand.

Rogaland

Haugesund.

Telemark

Kragerø, Notodden, Skien.

Troms

Harstad.

Trøndelag

Namsos, Steinkjer.

Vestland

Alver, Kinn, Øygarden, Bergen, Bømlo, Voss, Stord.

Vestfold

Horten/Tønsberg (fellesprosjekt), Larvik, Holmestrand, Færder, Sandefjord.

Østfold

Indre Østfold, Moss.